НЬЮ-ЙОРК, 2023 оны арванхоёрдугаар сарын 25 /NHK/. НҮБ-ын Ерөнхий Ассамблей үхэлд хүргэх аюултай автомат зэвсгийн системээс /LAWS/ үүдэлтэй сорилт, сэтгэл түгшээсэн асуудлуудыг яаралтай шийдвэрлэх шаардлагатай байгааг онцолсон тогтоолыг олонхын саналаар баталжээ.

Ийм системүүд нь байг сонгож, довтлохдоо хүний оролцоогүйгээр хиймэл оюун ухаан ашигладаг тул тулалдааны талбарт ашиглах нь энгийн иргэд хохирох явдлыг нэмэгдүүлж болзошгүй байна.

Ерөнхий Ассамблейн чуулганд өргөн мэдүүлсэн тогтоолд LAWS нь дэлхийн аюулгүй байдалд сөргөөр нөлөөлж болзошгүйд санаа зовниж буйгаа илэрхийлсэн байжээ. Түүнчлэн системүүдээс үүдэн тулгамдаж буй сорилтуудыг тоймлон харуулсан тайлан ирүүлэхийг НҮБ-ын Ерөнхий нарийн бичгийн дарга Антонио Гутеррешээс хүссэн байна. Уг тогтоолыг Япон, АНУ зэрэг 152 орон дэмжсэн бол Орос, Энэтхэг зэрэг дөрвөн орон эсрэг санал өгч, Хятад, Умард Солонгос, Израил болон бусад найман улс түдгэлзсэн байна. Дэлхийн улс орнууд хиймэл оюун ухаан ашиглан зэвсгийн системийг хөгжүүлэхээр хүчин чармайлт гаргаж буй үед ийм зэвсгийн талаарх Ерөнхий Ассамблейн анхны тогтоол энэ болж байна хэмээн Монамэ агентлаг дамжууллаа.