Монголбанкнаас ипотекийн зээлийн 5 дугаар сарын эхний санхүүжилт 45 тэрбум төгрөгийг хуваарилаад байна. Үүний 15.7 тэрбумыг төв банкнаас, 29.4 тэрбумыг нь Засгийн газраас санхүүжүүлж, нийтдээ 657 иргэн хамрав.

Монголбанкны Олон нийттэй харилцах мэдээллийн төвийн ахлах мэргэжилтэн Д.Ариунаа, “Одоогийн энэ санхүүжилт нь улс орны эдийн засгийн хүндрэлтэй нөхцөл байдалтай холбоотой 2016 оны 10 дугаар сард шинэчлэгдэн гарсан Ипотекийн зээлийн санхүүжилтийн тухай журмаар зээлийн эргэн төлөлтөөр хийж байгаа. Дээрх журмаар Монголбанк сар бүрийн эхний болон сүүлийн 7 хоногт гэсэн графикаар сард хоёр удаа эргэн төлөлтийн хөрөнгийг эргээд арилжааны банкуудад тогтмол санхүүжүүлэн хуваарилан олгож байна. Оны нэгдүгээр улирлын байдлаар 48.1 тэрбум төгрөгийн санхүүжилтийг банкуудад хуваарилж, 706 иргэн хамарсан” гэв.
Энэ оны 5 дугаар сараас эхлээд Засгийн газар төсөвт 122 тэрбум төгрөг суулгасан. Ингэснээр хамтарсан санхүүжилт хийж байна.
Засгийн газар Олон улсын валютын сан (ОУВС)-гаас урьдчилсан санхүүжилтийн хөтөлбөрт хамарч зээл авахын тулд Монголбанкинд төслийн шинжтэй бүтцийг хэрэгжүүлэхийг зогсоох зөвлөмж гарсан. Үүний дагуу орон сууцны зээлийн хөтөлбөрийг Засгийн газарт шилжүүлэх бэлтгэл ажил Монголбанкинд хийж байна.
Тодруулга:Монголбанкнаас 2017, 2018 онд орон сууцны зээлийн хөтөлбөрийг өөрийн өмчлөл дэх ипотекийн зээлийн багцын эргэн төлөлтийн орлого, Засгийн газар 2017, 2018 оны улсын төсөвт тусгасан эх үүсвэрээр тус тус санхүүжүүлж байна. Үүний хүрээнд 2017 онд нийт 5.585 зээлдэгчийн 353.6 тэрбум төгрөгийн эх үүсвэр олгосон. Үүнд:

• Монголбанкнаас 3925 зээлдэгчийн 242.6 тэрбум төгрөг,
• Засгийн газраас 1660 зээлдэгчийн 110.9 тэрбум төгрөг,

2018 оны тавдугаар сарын 11-ний өдрийн байдлаар нийт 5.585 зээлдэгчийн 353.6 тэрбум төгрөгийн эх үүсвэр олгосон. Үүнд:

• Монголбанкнаас 939 зээлдэгчийн 63.9 тэрбум төгрөг,
• Засгийн газраас 424 зээлдэгчийн 29.4 тэрбум төгрөг