Бүгд Найрамдах Сингапур Улсын Төрийн агентлаг “Singapore Enterprise” байгууллагын Хятад, Монголын зах зээлийг хариуцсан бүсийн захирал Фунг Ка Кеонг тэргүүтэй төлөөлөгчид манай улсад ажлын айлчлал хийж байна. “Эрдэнэс Монгол” ХХК-ийн тэргүүн дэд захирал С.Эрдэнэбулган өчигдөр /2018.08.07/ зочдыг хүлээн авч уулзлаа.

Тус байгууллага нь Худалдаа, аж үйлдвэрийн яаманд харъяалагддаг бөгөөд Сингапур улсын бизнес эрхлэгч, хөрөнгө оруулагчдыг олон улсын зах зээлд таниулж, дэмжлэг үзүүлэхэд бодлогоо чиглүүлдэг байна. Агентлагийн төлөөллүүд “Эрдэнэс Монгол” ХХК-ийн үйл ажиллагаатай танилцаж, хамтран ажиллах сонирхолтой байгаагаа илэрхийлэв.

“Singapore Enterprise” агентлагийн Хятад, Монголын зах зээлийг хариуцсан бүсийн захирал Фунг Ка Кеонг хэлэхдээ “Өнөөдрийн байдлаар 400 гаруй үндэстэн дамнасан корпораци Сингапур улсад худалдааны бүсийн төвөө байгуулсан нь түүхий эдээ таваарын зах зээл болон биржээр дамжуулан олон улсад худалдаалах боломж бүрдсэн. Манай агентлагийн зүгээс санхүүгийн эх үүсвэр хайж буй бизнес эрхлэгч, компаниудад бага хүүтэй зээл олгох болон худалдааны бүсийн төв байгуулахад татварын хөнгөлөлт үзүүлэх зэргээр дэмждэг. Монгол Улсын дэд бүтцийн салбарт хөрөнгө оруулж, хамтран ажилладаг БНСУ-ын томоохон компани болох KEPCO гэхэд Сингапурт бүсийн төвөө байгуулан ажиллаж буйг хэлэхэд таатай байна. Тиймээс “Эрдэнэс Монгол” ХХК бидэнтэй хамтран ажиллаж, олон улсын зах зээлд бүтээгдэхүүнээ гаргах боломжийг санал болгож байна. Манай байгууллага нь 39 оронд салбартай бөгөөд Бээжин дэх худалдааны төлөөлөгчийн газрыг төлөөлж үйл ажиллагаа явуулдаг” гэв.

“Эрдэнэс Монгол” ХХК-ийн тэргүүн дэд захирал С.Эрдэнэбулган “Багануур” ХК, “Шивээ-Овоо” ХК-ийн техник технологийн шинэчлэл, хөрөнгө оруулалтын талаар хөндөж, уул уурхайн салбарт хэрэгжүүлж буй бодлого, үйл ажиллагааг танилцууллаа.

Уулзалтад Стратеги, төлөвлөлтийн газрын захирал Д.Чимэддорж, Нэгдсэн удирдлагын газрын захирал М.Цэнгэл, ОНХА-ны ахлах мэргэжилтэн А.Тэмүүжин нар оролцов.

Боловсруулсан: Д.Доржмаа