Коронавирусийн халдвар авч гэртээ эмчлүүлж буй 2000 орчим иргэн байгаа талаар өчигдөр ЭМЯ-наас мэдээлсэн. Гэрээр эмчилгээ эхлүүлсэн хүмүүсийн 8.7 хувь нь эмчилгээний явцдаа эмнэлэгт хэвтсэн байна. Тэдгээрийн дийлэнх нь өөрийн хүсэлтээр хэвтсэн бөгөөд цөөн тохиолдолд хүндрэх шинж тэмдэг илэрсний дараа эмнэлэг рүү шилжүүлсэн гэдгийг хэлж байсан юм. Бие даан өөрийгөө эмчилж, халдварыг гэрээр эдгээсэн иргэдтэй холбогдож, тэдний туршлага зөвлөгөөг сурвалжиллаа.

ИРГЭН Г.НОМИН: ГАНГА ӨВС БУЦАЛГАЖ УУГААД БИЕИЙН БАЙДАЛ ИЛТ САЙЖИРСАН

"Ковид-19" вирусийг тусаж, улмаар гэртээ өөрийгөө 21 хоногийн

дотор эмчилж, эдгээсэн иргэн Г.Номин “АНУ-д амьдарч байхдаа ковид тусаад эмчээсээ зөвлөгөө авч байсан. Тухайн үед эмч маань гэртээ өөрийгөө эмчлэхийг санал болгосон юм. Миний хувьд дархлаа сулруулах химийн эмчилгээ байнга хийлгэдэг, биологийн дархлаа сулруулагч хэрэглэдэг эрсдэлтэй бүлгийн хүн л дээ. Ерөнхийдөө цусан дахь хүчилтөрөгчөө гэртээ шалгадаг аппаратаар шалгаад 95 хувиас доош болвол эмч ирээрэй гэсэн. Ингээд 94 хувьтай болсон л доо. Ганга өвсийг эх орондоо байхдаа эмийн сангаас авсан, нэг уутныхаа гуравны нэгийг л хэрэглэсэн. Улмаар буцалгаж уусны дараа биеийн байдал илт сайжирсан. Ганга өвс хэрэглэсний дараа цэр гадагшилдаг юм билээ. Мөн нэмэлтээр А, С, D витамин хэрэглэж дархлаагаа дэмжиж байлаа. Коронавирусийг эмчлэхэд надаас ойролцоогоор нийт 10 долларын зардал гарсан гэж бодож байна. Түүнчлэн цусан дахь хүчилтөрөгч хэмждэг багаж маань 20 долларын үнэтэй байсан” гэв. Мөн тэрбээр “Коронавирусийн халдварыг авсны дараа хэрэглэж болохгүй, хориглосон эм, тариа гэх мэтчилэн зүйлийг эмч хэлээгүй. Гэхдээ анхаарвал зохих нэг зүйл нь, цусан дахь хүчилтөрөгчийг хэмждэг багаж маш хэрэгтэй санагдсан. Хуруундаа хийгээд хэмждэг тус аппарат бий” хэмээн хэллээ.

ИРГЭН Т.БАТ-ЭРДЭНЭ: ХӨНГӨН ӨВЧИЛСӨН ТОХИОЛДОЛД ХАМАР, ХООЛОЙГОО САЙТАР ЦЭВЭРЛЭЖ, ВИТАМИНАА УУЖ, ХООЛОО ЦАГТ НЬ ИДЭХ НЬ ЧУХАЛ

Коронавирусийн халдвараар өвчилсний дараа, өөрийгөө хэрхэн эмчлэх талаар иргэн Т.Бат-Эрдэнийн туршлагаас хуваалцлаа.

Тэрбээр “Би мэргэжлийн хүн биш учраас ямар эм, тариа хэрэглэхийг зөвлөж чадахгүй. Харин ковид туссан үедээ авч байсан өөрийн туршлагаас ярья. Халдвар авсан тохиолдолд хамар, хоолойн салстад вирус их үрждэг. Ингэж үржээд байгаа шалтгаан нь уушги руу орох үндсэн нөхцөлийг бүрдүүлж байгаа гэж хувьдаа ойлгосон. Тиймээс өглөө, өдөр, орой бүр содатай ус, жамц давс эсвэл зориулалтын уусмалаар ам, хамраа зайлах нь чухал юм. Ингэхдээ хоёр хамраа тус бүр таван удаа зайлсны дараа хоолойгоо ч мөн адил 4-5 удаа зайлах хэрэгтэй. Ингээд заавал 2-3 аяга халуун бүлээн шингэн ус уух нь зүйтэй. Улмаар хоолойн салстад наалдсан вирусийг ходоод руу хөөж оруулж байна гэсэн үг.

Ерөөс хамгийн чухал зүйл нь энэ. Түүнчлэн C, D витаминыг тунг нь тааруулж хэрэглэнэ. Хэрэв суурь өвчингүй, ковидыг хөнгөн туссан бол дархлаа дэмждэг лааг хэрэглэж болно. Миний хувьд маш их сонгинотой, хонины махтай хар шөлийг хүчээр идэж байсан.

Хэдийгээр дотор муухай оргиж байсан ч дархлаагаа дэмжихийн тулд хүчээр идэж байлаа. Сонгино нь цус цэвэрлэдэг ашиг тустай учраас хоолондоо түлхүү хийж байсан. Хамар, хоолойгоо сайтар цэвэрлэж, витаминаа ууж, хоолоо цагт нь идвэл хөнгөн өвчилсөн хүмүүс тав хоногийн дотор зүгээр болно. Хамгийн гол нь вирусийг уушги руугаа оруулж болохгүй. Хэрэв уушги руу орвол хатгаа болно, улмаар өвчин нь хүндэрч антибиотик тариулах шаардлага үүснэ гэсэн үг. Гадаадад амьдарч буй монголчууд маань эмнэлгийн тусламж авч чадахгүй байгаа учраас өөрсдийгөө гэртээ эмчилж байгаа гэсэн. Тэдэнд би өөрийн туршлагыг үндэслэн зөвлөгөө өгсний дараа хоолой, ам нь онгойсон ярьж байна лээ. Суурь өвчингүй хүмүүс нь вирусийг уушгиндаа оруулахаас сэргийлэх аргыг хэрэглэх нь зүйтэй. Харин суурь өвчтэй хүмүүсийн тухайд зөвлөгөө өгч чадахгүй, би эмч биш учраас. Чихэр өвс ковидыг анагаахад ач тустай байна гэдгийг дуулсан. Чихэр өвсийг хандлаад уувал үр дүн маш сайн байна гэсэн. Чихэр өвс хэрэглэсний дараа тав хоногийн дараа бие нь саяжирсан гэж дуулсан. Германд амьдардаг монголчуудтайгаа холбогдоход энэ тухай ярьж байсан. Хамгийн гол нь ковид туссан үед сэтгэл санаагаа тайван байлгах нь зүйтэй. Хэрэв сэтгэл зүй тогтворгүй бол дархлаа дагаад унах эрсдэлтэй“ гэсэн юм.

Иргэн А.Баасансүрэн: Халдвараар өвчилж эдгэрсний дараа нэг километр ч гүйж чадахгүй болсон

Австри улсад суралцаж буй иргэн А.Баасансүрэн “Намайг халдвар авах үед энд өдөрт 7000 орчим тохиолдол бүртгэгдэж байсан. Эмнэлгийн ачаалал нэмэгдсэн учраас хөнгөн өвдсөн хүмүүсийн ихэнх нь гэртээ өөрийгөө эмчилсэн юм. Миний биед илэрсэн зовуурь гэвэл, хоолой өвдөж, толгой эргэсэн. Улмаар шинжилгээний хариу эерэг гарсан. Тухайн үед эмч нарын зүгээс гэртээ байхыг анхааруулж, ухаан алдаж унасан тохиолдолд л залгаарай гэж зөвлөсөн юм. Эмнэлийн зүгээс ямар эм, тариа хэрэглэх талаар зөвлөөгүй. Тийм учраас чухам юу хэрэглэхээ сайн мэдэхгүй байсан. Миний хувьд өвчний шинж тэмдэг өдөр бүр хурдан өөрчлөгдсөн учраас маш их ядарч байлаа.Ингээд халуун шөл, халуун цай, бүлээн ус, зөгийн бал болон нимбэгтэй халуун ус уудаг байсан. Тэгээд зузаан хөнжлөөр өөрийгөө хучаад сайтар унтаж амарсан л даа, Түүнчлэн халуун ваннанд хэвтэх зэргээр өвчнийг хөлс болгож гадагшлуулах арга хэмжээ авсан. Хамгийн гол нь дархлаагаа дэмжих зорилгоор сайтар амарч, халуун бүлээн шингэн уух нь зүйтэй. Миний хувьд өвчин нийт ес хоног үргэлжилсэн. Эхний хоногуудад хоолой өвдөж, яс янгинаж цаашлаад толгой өвдөж, нуруу цээжээр хөндүүрлэж, амт, үнэр мэдрэхээ болих, биеэр юм туурах зэрэг шинж тэмдэг нь илрээд л дууссан. Гэхдээ эдгэрээд хэвийн амьдралдаа орсны дараа эхний сардаа маш их ядарсан. Бүр нэг давхрын шатаар гарах төдийд амьсгааддаг болдог юм билээ” хэмээлээ.

Тэрбээр ковид тусаж эдгэрсний дараа биед илрэх шинж тэмдгийг ярихдаа “Өвдсөнөөс хойш сарын хугацаанд амьсгалж найтаахад цээж маань хөндүүрлэж өвддөг байсан. Иймээс өглөөд нэг цаг алхах гэх мэтчилэн хөнгөн дасгал хийснээр арай дээрдэж эхэлсэн л дээ. Ер нь тусаад эдгэсэн хүмүүс бага багаар хөнгөн хөдөлгөөн хийж дархлаагаа сайжруулах нь чухал юм билээ. Би эдгэрээд гурван сарын дараа өглөөгүүр алхаж эхэлсэн. Үүний дараа дархлаа маань сайжирч сэргэсэн байх. Халдвараар өвчилж эдгэрсний дараа бие сулардаг юм байна лээ. Өмнө нь 30 минутын хугацаанд таван километрт төвөггүй гүйдэг байсан. Тэгтэл ковидын дараа хэсэг хугацаанд нэг километр ч гүйж чадахгүй байсан. Улмаар өглөө бүр алхсаар одоо л хэвийн байдалдаа шилжиж байгаа. Ер нь өвдсөн хүмүүс янз бүрийн шинж тэмдэгтэй байсан ч, тэдний ихэнх нь маш их ядарч сульдсан тухайгаа ярьдаг” гэсэн юм.

П.САЙНЖАРГАЛ