БРЮССЕЛЬ. /Reuters/. Европын Холбооны /ЕХ/ гишүүн орнууд Оросын байгалийн хийн үнэд хязгаар тогтоох асуудлаар улс төрийн зөвшилцөлд хүрлээ гэж тус холбооны хэвлэлийн мэдээнд дурджээ. 

Мэдээнд дурдсанаар, үнийн дээд хязгаар Европын хийн зах зээлийн тохируулгын механизмын хүрээнд мөрдөгдөнө. Хэрэв TTF индексээр байгалийн хийн ирэх сард нийлүүлэх фьючерс хэлцлийн үнэ гурван өдрийн турш нэг мегаватт цагт 180 еврогийн (мянган шоо метр нь 2 мянга орчим ам.доллар) түвшнээс дээш байвал механизм идэвхэжнэ.

ЕХ-ны гишүүн орнууд мөн хийн үнийг хязгаарлах механизмыг нэг сар, гурван сар, жилийн өмнөх дериватив гэрээнд хэрэглэх шийдвэр дээр санал нийлсэн байна.  Энэхүү механизмыг 2023 оны хоёрдугаар сарын 15-наас мөрдөж эхэлнэ. 

“Эрчим хүчний эх үүсвэрийн үнэ огцом өсөхөөс иргэдээ хамгаалах чухал шийдвэрт бид хүрч чадлаа. Биднийг эрсдэлээс хамгаалах, хангамжийг найдвартай болгох, санхүүгийн зах зээлийг тогтвортой байлгахад шаардлагатай урьдчилан сэргийлэх арга хэмжээнүүдийг багтаасан бодитой, үр дүнтэй механизмыг бид бий болгоно" гэж Чехийн Үйлдвэр, Худалдааны сайд Жосеф Сикела энэ шийдвэрийн талаар тайлбар хийхдээ мэдэгджээ.

Өмнө нь нэг мегаватт цагт 275 евро (мянган шоо метр тутамд 3000 орчим ам.доллар) байх "тааз"-ын хувилбар яригдаж байсан байна хэмээн Монцамэ агентлаг мэдээллээ.