КАИР, 2024 оны хоёрдугаар сарын 1. /TASS/. Барьцаалагдсан хүмүүсийг солилцох шинэ тохиролцооны хүрээнд Израилын шоронд хоригдож буй палестинчуудыг үе шаттайгаар суллах саналыг Палестины ХАМАС хөдөлгөөн зөвшөөрсөн тухай “Al Hadath” телевизийн суваг мэдээлжээ.

Тус сувгаар мэдээлснээр, Парист саяхан болсон уулзалтын үеэр боловсруулсан шинэ санаачилгын хүрээнд тус хөдөлгөөнийхөн палестинчуудыг шоронгоос үе шаттайгаар суллахыг зөвшөөрсөн байна. Тохиролцооны эхний үе шатанд ХАМАС "олон жилийн хорих ялтай хүмүүсийг суллахыг шаардахгүй" аж. 

Үүний сацуу тус бүлэглэл “Парист боловсруулсан саналыг бүрэн зөвшөөрч байгаа эсэх тухайд хариу өгөөгүй” гэдгийг “Al Hadath”-ын эх сурвалжууд дурдсан байна.  Саяхныг хүртэл ХАМАС-ын удирдлага "Газад барьцаалагдсан хүмүүсийг суллах хэд хэдэн болзлыг биелүүлсэн тохиолдолд л яриа хэлэлцээ хийнэ" гэж мэдэгдэж байсан бөгөөд Израилын шоронд хоригдож буй Палестины бүх иргэнийг нэгэн зэрэг суллахыг шаардаж байв.

АНУ-ын Тагнуулын төв газрын (ТТГ) дарга Уильям Бернс Египет, Израил, Катарын төлөөлөгчидтэй Парист уулзсан тухайгаа нэгдүгээр сарын 28-нд France Presse агентлагт мэдээлжээ.

Харин NBC суваг мэдээлснээр, уулзалтад оролцогчид ХАМАС болон Израилын хооронд байгуулах шинэ хэлэлцээрийн нөхцлүүдийг тохиролцсон байна. Уг хэлэлцээрт Газын зурваст барьцаанд байгаа хүмүүсийг Палестины хоригдлуудаар үе шаттайгаар солилцох, байлдааны ажиллагааг түр зогсоох, Газын зурваст үзүүлэх хүмүүнлэгийн тусламжийн талаар тусгажээ. Парист болсон уулзалтын үеэр Израилтай хэлэлцээ хийх саналыг хүлээн авсан гэдгээ ХАМАС нэгдүгээр сарын 30-нд мэдэгджээ хэмээн Монцамэ агентлаг дамжууллаа.