Өнөөдөр 10:00 цагийн орчимд Өмнөговь аймгийн Цогтцэций сумын Цагаан овоо багаас зүүн урагш 10 км газарт 3.8 магнитутын хүчтэй газар хөдлөлт болжээ. Газар хөдлөлтийн чичирхийлэл өчигдрөөс эхэлсэн бөгөөд өнөөдрийг хүртэлх хугацаанд 20 орчим удаагийн газар хөдлөлт болсон талаар албаныхан мэдээллээ.

Үүнтэй холбоотойгоор яг одоо Цогтцэций суманд иргэдийг хоргодох байр болон кемп, гэр зэрэгт нүүлгэн шилжүүлж, аюулгүй байдлыг хангасан байна. Үүнд Цогтцэций суман дахь дотуур байранд амьдардаг сурагчид, мөн Тавантолгойн ордод үйл ажиллагаа явуулдаг уул уурхайн компанийн ажилтнууд болон бусад иргэд багтаж байгаа аж. Мөн Цогтцэций сумын хэмжээнд эрчим хүчийг хязгаарлажээ.

Онцгой байдлын ерөнхий газрын Гамшигтай тэмцэх газрын ерөнхий зохицуулагчаас өгсөн чиглэлийн дагуу өндөржүүлсэн бэлэн байдлыг өнөөдөр сумын хэмжээнд зарлан, шаардлагатай бүхий л арга хэмжээг авч ажиллаж байна гэж Өмнөговь аймгийн Онцгой байдлын газрын дарга Л.Баярсайхан хэллээ.

Эл ажиллагаанд аймаг, сумын цагдаагийн албан хаагчид татагдан оролцож байгаагийн зэрэгцээ сургууль, эмнэлэг зэрэг обьектыг мөн давхар хамгаалалтад авч ажиллаж буй юм байна. Тиймээс газар хөдлөлт болсон Цогтцэций сумыг өндөржүүлсэн бэлэн байдалд шилжүүлэхээр болжээ.

Б.Баясгалан