Монгол Улс анхдугаар Үндсэн хуулиа баталж, Бүгд Найрамдах улсаа зарлан тунхагласны 93 жилийн ойг тохиолдуулан Монгол Улсын Ерөнхий сайд, Монгол Ардын Намын дарга  У.Хүрэлсүх, Ерөнхий Нарийн Бичгийн дарга Д.Амарбаясгалан, УИХ-ын дэд дарга Л.Энх-Амгалан болон УИХ, Засгийн газрын гишүүд, Монгол Ардын намын Удирдах зөвлөлийн ажлын алба, гишүүд дэмжигчид өнөөдөр жанжин Д.Сүхбаатарын хөшөөнд цэцэг өргөж, Их Эзэн Чингис хааны хөшөөнд хүндэтгэл үзүүллээ.

Одоогоос 93 жилийн өмнө буюу 1924 оны энэ өдөр Монгол улс анхдугаар Үндсэн хуулиа баталж, Хаант засгаас Бүгд найрамдах засаглалд шилжиж, хамжилгат ёсыг халан, үндэсний ардчилсан өөрчлөлт, эрхзүйн чухал зарчмууд, улс төрийн цоо шинэ тогтолцоог хуульчлан баталгаажуулсан нь Монголын түүхийн асар том үйл явдал юм. Анхдугаар Үндсэн хууль батлагдсан нь нийгэм эдийн засгийн олон ололтыг манай улсад бий болгон батжуулсан төдийгүй Монголын газар шороо, хөрсөн доорх баялаг, ой мод, ан амьтан зэргийг ард түмний өмч гэж зарлаж байжээ. Түүнчлэн иргэдийн сонгох сонгогдох эрхийн асуудлыг хуульчлан, Азид анх удаа Монгол Улс эмэгтэйчүүд эрчүүдтэй адил тэгш эрхтэй байх явдлыг хангаж өгсөн байдаг.

Тиймээс энэхүү түүхт өдрийг монголчууд хотол олноороо тэмдэглэх нь ихээхэн ач холбогдолтой юм. Бүгд Найрамдах Улсаа тунхагласны ойг нийтээр тэмдэглэх баярын өдөр болгон ёслол төгөлдөр тэмдэглэж ирсэн уламжлалтай ч 2012 оноос уг өдрийг "тэмдэглэлт өдрийн" түвшинд өнгөрөөх болсон юм. Энэ нь түүхийн чухал үйл явдлын ач холбогдлыг багасгаж, түүх уламжлалыг бүдгэрүүлж байна хэмээн үзэж 2016 онд УИХ-ын гишүүн Я.Содбаатар тэргүүтэй УИХ дахь МАН-ын 9 гишүүн “Нийтээр тэмдэглэх баярын болон тэмдэглэлт өдрүүдийн тухай” хуульд нэмэлт, өөрчлөлт оруулах тухай хуулийн төслийг боловсруулж УИХ-д өргөн барьснаар энэ өдрийг дахин эх орныхоо тусгаар тогтнол, иргэн хүний эрх чөлөөтэй байдлыг бахархан хүндэтгэж “нийтээр тэмдэглэх баярын өдөр” болгон хуульчлан баталсан билээ.