Богд уулнаас нойтон мод бэлтгэж байна гэсэн иргэдийн гомдолд БОАЖЯнаас тайлбар хийлээ. 

Байгаль орчин, аялал жуулчлалын сайдын 2017 оны 8 дугаар сарын 23-ны өдрийн А/235 тоот тушаал, 2018 онд ойгоос бэлтгэх модны дээд хязгаар батлах тухай тушаалыг үндэслэн Богдхан уулын дархан цаазат газрын захиргааны үнэлгээний комисс 2018 оны 1-р сарын 15-ны өдөр сонгон шалгаруулалт явуулсны үндсэнд ойн цэвэрлэгээ эхлүүлсэн.

Одоогоор Богд ууланд тусгай зөвшөөрөлтэй “Эбээ” ХХК, “Тод ногоон” ХХК, “Ойншинэс трейд” ХХК-ийн ажилчид Богдхан уулын ДЦГ-ын Хамгаалалтын захиргааны хяналт дор ойн цэвэрлэгээ хийж байна. Ойгоос нойтон мод огтлох боломжгүй бөгөөд цэвэрлэгээнээс үлдсэн хаягдлыг эмзэг бүлгийн иргэдэд олгож байна гэж Байгаль орчин аялал жуулчлалын яамнаас мэдээллээ.