БНХАУ-ын Бээжин хотноо зохиогдсон “Бүс ба Зам” олон улсын хамтын ажиллагааны дээд хэмжээний уулзалтын үеэр Хятадын Экспорт, зээлийн даатгалын корпораци (SINOSURE)-тай 400 сая ам.доллар хүртэлх дүнтэй төсөл, хөтөлбөрийн санхүүжилтэд даатгалын дэмжлэг авах “Хамтын ажиллагааны гэрээн”-д гарын үсэг зурлаа. Гэрээг байгуулах үйл ажиллагаанд Монгол Улсын Хөгжлийн банкны Гүйцэтгэх захирал Б.Батбаяр, Хятадын Экспорт, зээлийн даатгалын корпорацийг төлөөлж Eрөнхийлөгч Ван Тинке Болон албаны бусад хүмүүс оролцов.

Монгол Улсын Хөгжлийн банк нь Монгол Улсаас Хятадын Экспорт, зээлийн даатгалын корпорацитай 2016 оноос эхлэн хамтын ажиллагааг эхлүүлэх чиглэлээр хэлэлцэж ирсэн бөгөөд сүүлийн гурван жилд банкны санхүүгийн нөхцөл байдал сайжирсантай холбогдуулан энэхүү гэрээг байгуулах боломж бүрдсэн юм. Гэрээний хүрээнд Монгол Улсын эдийн засгийн тэргүүлэх ач холбогдол бүхий төсөл, хөтөлбөрүүдийг Хятадын Экспорт, зээлийн даатгалын корпорацийн даатгалтайгаар БНХАУ-ын банк, санхүүгийн байгууллагуудын урт хугацаатай, хямд эх үүсвэрээр санхүүжүүлэх боломж бүрдэх ба энэ нь хоёр улсын эдийн засгийн хамтын ажиллагаанд томоохон түлхэц болох юм.