Зохион байгууллагдаж эхлэсэн цагаасаа төрөл, явагдах газар орон, оролцогч орнууд зэрэг агуулга, ач холбогдлын хувьд өсөн нэмэгдэж байгаа “Армейские игры”олон улсын цэргийн наадам тун удахгүй гараанаас хөдлөх гэж байна. Энэ жилийн хувьд 10 улсын газар нутагт цэргийн мэргэжлийн 32 төрлөөр 6000 орчим цэргийн алба хаагчид 8 дугаар сарын 3-наас 17-ны хооронд өрсөлдөж, цэргийн мэргэжлийн аваргуудаа шалгаруулна. 

Цэргийн наадмын нэг төрөл болох “Мэргэн буудагчийн зааг” тэмцээнд Монгол Улсын Зэвсэгт хүчний баг 4 дэх жилдээ оролцохоор Беларусь улсын “Брест” хотод байрлах Тусгай хүчний хээрийн сургалтын төвд бэлтгэлээ хангаж байна. Өнөөдөр манай цэргийн алба хаагчид тэмцээнд ашиглах зэвсэглэлүүдээ тусгалд орууллаа.

Мөн тэмцээний шүүн явуулах шүүгчдийн бүрэлдэхүүн хуралдаж, тэмцээн явагдах журам, хориглох болон анхааруулах зүйлсийн талаар нэгдсэн ойлголтыг өглөө. Монгол Улсаас “Мэргэн буудагчийн зааг” тэмцээний шүүгчийн бүрэлдэхүүнд ЗХЖШ-ын Ар талын газрын Зэвсэглэлийн хэлтсийн дарга, хурандаа П.Чинзориг ажиллаж байгаа юм.