Олон нийтийн сүлжээнд ШТС-ын ажилтны өөдөөс хутга гарган, сүрдүүлсэн бичлэг цацагдсан. Энэ талаар цагдаагийн байгууллагаас тодруулахад, хутга гарган танхайрсан этгээдийг шалгаж байна гэв.

Тодруулбал, Цагдаагийн байгууллагад 2024 оны арванхоёрдугаар сарын 28-29-ний шилжих шөнө нийслэлийн Баянгол дүүргийн долдугаар хороо Гэмтлийн эмнэлгийн орчимд байрлах "М-Ойл" ШТС-ын гадна хутгатай хүн танхайраад байна гэх дуудлага мэдээлэл бүртгэгдсэн байна.

Шалгалтын явцад иргэн Б нь тус ШТС-ын хажууд тамхи татаж байхад түгээгчээс тамхи татаж болохгүй гэх шаардлагыг тавихад эсэргүүцэж хэрүүл маргаан үүсгэж, улмаар хутга гарган танхайрсан үйлдэлд шалгалтын ажиллагааг үргэлжлүүлж байгааг албаныхан мэдээллээ.