Дэлхийн улс орнуудад нийт 120 сан үйл ажиллагаа явуулж байна. Тэднийг хадгаламжжийн, баялгийн, тогтворжуулалтн гэсэн 3 үндсэн бүлэгт хуваадаг аж. Одоогоор манай улсад Тогтворжуулалтын (төсвийн тогтвортой байдлыг хангах үүрэгтэй), Ирээдүйн өв сангийн (хадгаламж үүсгэх зорилготой) сангууд бий. Харин уул уурхайн төслийн орлогыг нэгтгэн, дараагийн төслүүдийг санхүүжүүлэх зориулалт бүхий сан байхгүй. Иймд “Эрдэнэс Монгол” компани Баялгийн сангийн хуулийн төслийг боловсруулжээ.

1960-аад онооос хойш Норвеги, Бразил, Австрали, Канад гэх мэт уул уурхайн эрдэс баялагтай орнууд олон сан байгуулан ажиллуулжээ. Тэд төрөл бүрийн загварыг хэдийнэ туршсан тул бид цоо шинэ зүйл хайх шаардлагагүй. Амжилттай ажиллаж, уул уурхайгаас олсон орлогоо улам өсгөн арвижуулсан сангуудаас суралцахад л хангалттай гэж П.Ганхүү захирал тайлбарлав.

Манай улсын иргэн бүр “ЭМ”-ын нэг ширхэг давуу эрхийн хувьцааг эзэмшдэг. 2032 онд Монголын нийт хүн ам 5 саяд хүрнэ. Энэ хэрээр компаний хувьцаа эзэмшигчийн тоо өснө. Дээр дурдсан Баялгийн сан зөв, ашигтай ажилласнаар бид хувьцааны өгөөжөө хүртэж эхэлнэ. Үүний тулд эхлээд тус санд тодорхой хэмжээний орлого төвлөрсөн байх ёстой. Иймд 11.4 их наяд төгрөгийн активтай тус компанийн орлого, ашгийг танилцуулъя.

Давуу эрхийн хувьцаа нь энгийн хувьцаанаас ялгаатай. Бид давуу эрхийн хувьцаагаа бусдад шилжүүлж, худалдаж, өвлүүлж болохгүй. Хувьцааны өгөөжийг өөрөө л хүртэнэ.       

“Эрдэнэс Монгол” компани 12 охин компанитай, 80 ажилтантай. Тэдний 20 нь гадаадад дээд боловсрол эзэмшсэн, мэргэшсэн ажилтнууд. Мөн урт хугацаанд тогтвортой ажилласан хүмүүс олон. Өмнөх удирдлагууд чадварлаг баг бүрдүүлснийг П.Ганхүү захирал онцлов.