Өчигдөр буюу 12 дугаар сарын 26-нд Элчин сайдыг томилох асуудлаар зөвшилцөх тухай тогтоолын төслийг Засгийн газраас УИХ-д өргөн барьжээ. Энэ дунд Монгол Улсаас Бүгд Найрамдах Польш Улсад суух Онц бөгөөд Бүрэн эрхт Элчин сайдаар Наваан-Юндэнгийн Оюундарийг томилуулахаар санал болгосон байна. Уг саналыг Ерөнхийлөгч У.Хүрэлсүх дэмжжээ. Н.Оюундарийн хувьд олон нийт 2016-2020 онд УИХ-ын гишүүнээр ажиллаж байсан гэдгээр нь сайн мэддэг.

Гэхдээ түүний ажлын туршлага олон улсын харилцааны чиглэлээр түлхүү байдаг ажээ.

Тодруулбал Н.Оюундарь 2004-2006 онд НҮБ-ын Биологийн олон янз байдлын конвенцын талуудын бага хурлын дэд ерөнхийлөгчөөр сонгогдож ажилласан нь Монгол улсын нэр хүндийг өндөрт өргөж НҮБ-ын хэмжээнд хамгийн анх удаа олон улсын хурлыг даргалхаар Монгол хүн сонгогдсон явдал болсон ба мөн 2004 онд НҮБ-ын Цөлжилттэй тэмцэх конвенцийн Ази Африкийн бүсийн хурлыг 70 улсын оролцогчтойгоор Монгол улсад гардаж зохион байгуулсан нь хамгийн анхны НҮБ-ын хэмжээний хурал болсон аж.

Түүнчлэн тэрээр УИХ-ын гишүүн байхдаа Европын Холбоо Монгол Улсын парламент хоорондын бүлгийн даргаар ажиллаж байжээ.

Украин, Оросын дайн болж байгаа ийм эгзэгтэй үед Европын Холбоотой хамтын ажиллагаагаа бэхжүүлэх шаардлагатай, Европын Холбоонд хүлээн зөвшөөрөгдсөн хүн элчин сайд байх нь маш чухал гэж үзсэн тул түүнийг Польш улсад суух элчин сайдаар томилуулахаар төрийн удирдлагууд шийдсэн бололтой. Тэр бүү хэл уг томилгоо дараа дараагийн элчин сайд нарт тавигдах босгыг өндөр болгож байна гэж МАН-ын удирдлагууд ч, салбарын мэргэжилтнүүд ч дүгнэж буй ажээ.

Наваан-Юндэнгийн Оюундарийн намтар

ТӨГССӨН СУРГУУЛЬ, МЭРГЭЖИЛ:

1991 онд Политехникийн их сургуулийн Гадаадын инженерийн бэлтгэл, 1991-1995 онд “Сэрүүлэг” дээд сургуулийг бизнесийн удирдлагын бакалавр зэрэгтэй төгсөж, 1997-1998 онд Нидерландын Вант Улсын Маастрихтын их сургуулийн бизнесийн удирдлагын магистр зэрэг хамгаалсан. Монгол Улсын Их Сургуулийн Хууль зүйн сургуульд Эрх зүйч мэргэжлээр сурч төгссөн. 

Орос, Англи сайн, Герман, Хятад хэлний дунд зэрэг мэдлэгтэй.  

АЖИЛЛАСАН БАЙДАЛ:

1995-1996 онд

Монголын Үндэсний бүтээмжийн төвд зөвлөх

1996-1997 онд

Монголын бизнесийн хөгжлийн агентлаг Европын холбооны ТАСИС хөтөлбөр зөвлөх

1997-1998 онд

Нэгдсэн Үндэстний байгууллагын Үйлдвэрийн газрын өөрчлөн байгуулалтын төсөлд зөвлөх

1999-2000 онд

Дэлхийн банк, Жижиг, дунд үйлдвэрийг дэмжих төсөлд зөвлөх

2000-2004 онд

Байгаль орчны яамны Гадаад харилцааны хэлтсийн дарга

2004-2006 онд

Байгаль орчны яамны Стратеги төлөвлөлт, бодлого зохицуулалтын газрын дарга

2006-2007 онд

НҮБ-ын Байгаль орчны хөтөлбөр Дундад Азийг хариусан зөвлөх

2008-2012 онд

Нийслэлийн Иргэдийн төлөөлөгчдийн Хурлын төлөөлөгч

2008-2010 онд

БНХАУ-ын Бээжин хот дахь Улаанбаатар хотын төлөөлөгч

2010-2014 онд

“Бльюмон” групп ХХК зөвлөх

2014-2015 онд

Гадаад хэргийн яамны дэд сайд

2015-2016 онд

“Бльюмон” групп ХХК зөвлөх

2016-2020

Монгол Улсын Их Хурлын гишүүн

2023 оноос

МАН-ын ЕНБДаргын Зөвлөх