Канадын цагдаагийн ажилтнууд Брэнтфорд хотын нэгэн жижигхэн зочид буудлын өрөөнөөс 30-137 см урттай 40 ширхэг амьд могой илрүүлсэн тухай “Рейтер” мэдээллийн агентлаг дамжуулсан байна. Эл хот нь Торонто хотоос 100 км-ийн зайд оршдог аж. Зочид буудлын ажилтнуудын мэдээлснээр, могой олдсон уг өрөөг гэр бүлийн хос нэг хоногоор түрээсэлсэн гэнэ. Гэвч цагдаагийнхан өрөө түрээслэгчдийг олж чадахгүй байгаа аж. Могойнуудыг маш таагүй байдлаар зүй бус орчинд чихэн хийсэн байсан ч мэргэжлийн хүмүүсийг дуудан асаргаанд өгснөөр нөхцөл байдлыг хэвийн болгосон аж. Чухам ямар шалтгаанаар нэг дор ийм олон могой цуглуулан хаа хүргэх гэж байсныг цагдаагийнхан тодруулахаар ажиллаж байгаа аж. Өнгөрсөн долоо хоногт Канадын Кэмпбелтон хотод савнаасаа гарсан аварга том могой хоёр хүүхдийг боон хөнөөсөн эмгэнэлт хэрэг гарсан билээ. Цагдаагийн ажилтнуудын мэдээлснээр, амьтны дэлгүүрийн нэгдүгээр давхарт оршиж байсан шилэн хоргоноос алдагдсан могой хоёрдугаар давхарт гарч унтаж байсан хүүхдүүд рүү дайрсан аж. Канадад аварга могойг хувь хүний эзэмшилд байлгахыг хориглодог аж