Дональд Трамп Японд 24 хувийн тариф ногдуулсан нь таамаглаж байснаас илүү өндөр дүн болов

Япон улсын Эдийн засаг, худалдаа, аж үйлдвэрийн сайд Ёжи Муто АНУ-ын Ерөнхийлөгч Дональд Трампын тус улсад ногдуулсан тарифыг харамсалтай хэрэг боллоо гэж байр сууриа илэрхийллээ. Мөн тарифаас чөлөөлөхийг АНУ-аас үргэлжлүүлэн шаардана гэдгээ тодотгосон байна.

Дональд Трамп Японд 24 хувийн тариф ногдуулсан нь таамаглаж байснаас илүү өндөр дүн болжээ. Мөн одоогоор Японы Худалдааны яамнаас тариф дотоодынх нь эдийн засагт хэрхэн нөлөөлөхийг тооцоолж байгаа юм байна. Харин “Nomura” судалгааны байгууллагын шинжээчид тарифын нөлөөгөөр Японы эдийн засгийн жилийн өсөлт 0.59 хувиар саарна гэж тооцоолжээ.

Дональд Трампын тарифын нөлөөгөөр Японы “Nikkei Index” 3.2 хувиар буурлаа. Тарифын улмаас Японы Төв банк бодлогын хүүг нэмэгдүүлэх шийдвэр ойрын хугацаанд гаргахааргүй байгаа нь тус улсын банкнуудын хувьд таагүй мэдээ болоод байна.