Хаврын мал төлөлт эхэлж, малчны хотод төлийн дуу цангинаж эхэллээ. Малчин хүнд мал ихэрлэх нь мал сүргийн буян хишиг дэлгэрч олон түмнээр өсөн үржихийн бэлгэдэл гэж үздэг. Энэ утгаар хурга ихэрлэхэд ард түмэн ихэд бэлгэшээдэг.

Тэгвэл Сүхбаатар аймгийн Эрдэнэцагаан сумын нэгдүгээр багийн малчин Э.Отгонбаярын хотонд таван ихэр хурга ихэрлэжээ.

Тус суманд могой жилийн хавар ээлтэй сайхан байгааг илэрхийлж байна хэмээн нутгийн ард түмэн бэлгэшээж байна.

Ихэр төлийн эзэн Э.Отгонбаяр нь малч удамтай нэгэн. Түүний өвөө Д.Баясгалан нь 1964 онд Монгол Улсын аварга малчин болж, Сүхбаатар аймгаас төрсөн анхны таван эрхэм хүмүүний  нэг хэмээн хүндлэгдэж ирсэн билээ. Тэгвэл малч удмын хотноос төлийн дуу цангинаж, таван ихэр хурга гарлаа.