АНУ-ын сенатч Кори Бүүкэр Сенатын хамгийн урт хугацааны илтгэлийн рекордыг шинэчилжээ. Тэрбээр 25 цагаас ч илүү хугацаанд илтгэл тавьсан юм.

Өмнөх дээд амжилтыг Бүгд Найрамдах намын сенатч Стром Турмонд 1957 онд Иргэний эрхийн хуулийн эсрэг 24 цаг 18 минут үргэлжилсэн илтгэлээрээ тогтоож байсан аж. 

Ардчилсан намын гишүүн тэрбээр илтгэлийнхээ туршид Трампын засаг захиргааг шүүмжилж, энэ үеийг Америкийн түүхэн дэх хамгийн ноцтой, аюултай үе хэмээн тодорхойлсон байна. 

55 настай Бүүкэр Сенатын Ардчилсан намын дөрөвдүгээрт эрэмбэлэгддэг гишүүн бөгөөд илтгэлийнхээ ихэнх хугацаанд Трампын бодлогоос болж хохирсон иргэдийн захидлыг уншжээ.  

Тэрбээр илтгэл тавих хугацааг шинэчлэн тогтоосныхоо дараа "Би удалгүй биологийн зарим нэг хэрэгцээгээ хангах шаардлагатай боллоо" хэмээн хошигносон байна.

Ийм төрлийн илтгэлийн дүрэм ёсоор сенатч илтгэлийнхээ туршид босоо зогсож, угаалгын өрөө ч орох ёсгүй байдаг аж. 

Бүүкэр илтгэлийнхээ эхэнд рекорд шинэчлэх зорилготой байсан гэж дурдаагүй юм. Түүний хувьд 2016 онд тавьж байсан илтгэлээсээ чадахынхаа хэрээр удаан байхыг хүссэн гэв.

Сенатчууд ихэвчлэн Филлибастер буюу ямар нэг хуулийн хэлэлцүүлгийг хойшлуулах, улс төрийн байр сууриа илэрхийлэх зэрэг зорилгоор ийм урт хугацааны илтгэл тавьдаг.